WILLEMSTAD.- Ku un total di 413 punto, Typhoon Swimmers a sali na di kuater lugá durante e Aruba Dolphins Invitational ku a tuma lugá den wikènt tras di lomba na Pisina Olimpico Roli Bislick na Aruba.

Diesshete landadó di Typhoon Swimmers a biaha pa Aruba huntu ku e coachnan Cecil York, Rogeny Cijntje i Seaver Betrian.

Cecil York tabatin hopi espektativa pa e kompetensia i por bisa ku e  resultadonan di Typhoon Swimmers a asta surpasá su espektativanan.

York ta bisa di ta sumamente kontentu ku prestashon di Typhoon su atletanan. "Den deporte di natashon e promé meta ta pa mehorá tempu. “Durante e kompetensia na Aruba e muchanan a logra baha hopi for di nan tempunan.  Sean Vinck, di 11, asta establesé ‘meet record’ nobo riba 100 meter barbulètè landando e 100 meter den  1:16 minüt pa superá e marka di 1:18 ku ta riba nòmber di Tyreke Wernet for di 2009. Alabes el a logra gana e High Point Trophy den e edat 9-10 aña maskulino.

Otro atletanan di Typhoon ku a destaká i ku a risibí High Point Trophy ta Keanyon Raper (2do lugá ku 54 punto) i Clarwin Conquet (3er puesto ku 45 punto) den grupo di 12 aña. Ian van Dijk a risibí e promé premio di High Point pa e 42 puntonan ku el a skor pa su tim den edat di 8 aña bai abou. Na tur Typhoon Swimmets a logra 18 medaya di oro 12 di plata i 8 di bròns.

Awor ku Aruba Dolphins Invitational ta tras di lomba Typhoon Swimmers ta sigui mesora ku preparashon pa partisipá na Delfines del Naco Invitational ku lo tuma lugá di 24 te ku 27 di e luna aki na República Dominicana. Despues di esei ta sigui ku e di 13 edishon di Siegfried Francisco kual lo tuma lugá 2-4 desèmber aki na Kòrsou.