Stingray Challenge 2022 

WILLEMSTAD.- Durante di e fin di siman di 1-3 di aprel último a tuma lugá na Pisina Olímpiko Roly Bisslik na Aruba, e di 15 edishon di Stingray Challenge 2022. Durante di e kompetensia aki Typhoon Swimmers su atletanan a sa di demonstrá kalidat i talento. Typhoon Swimmers su ekipo di natashon kompetitivo tin 13 aña di eksistensia ku diferente kategoria di edat di 8 pa 18 aña ku ta train na un nivel kla pa kompetí.

Typhoon a konkistá un total di 69 medaya i a resultá na di sinku lugá di e kompetensia tras di e ekiponan Aruba Dolphins, Stingray Swimming, Aruba Giants i Sithoc Swimclub.  Mester bisa si ku Typhoon a biaha ku un delegashon di 13 atleta i ku kada un a kompetí fuerte kontra ekiponan grandi ku mas ku 20 mucha. Nan a sòru di logra esaki despues di un temporada fuerte di training.

E atletanan ku mas a destaká pa Typhoon ta Sean Vinck (maskulino 9-10 aña), Kenyon Raper-Ricardo i Clarwin Conquet (maskulino 11-12 aña), Zinha Falbru (femenino 13-14 aña), Xiara Mora Polanco (femenino 15-17 aña) i Isacar Paula (maskulino 18 aña i mas). Nan kada un a risibi High Point Trophy den nan kategoria. E landadó Zinha Falbru a klasifiká  pa standard PRE ku un tempu di 29,61 riba 50m estilo liber.

Typhoon Swimmers ke gradesí e ekipo di Stingray Swimclub pa e dushi fin di siman. Tabata reina un esfera di kompetensia sano i e muchanan a sera amistat ku vários atleta di Aruba.

Training Typhoon

Typhoon Swimmers ta train tur dia na SDK i ta habrí pa mucha i hóbennan di e edat di 6 pa 18 aña ku ta interesá pa hasi natashon kompetitivo (Speed Swimming). Ta ofresé tambe Master Swimming pa personanan riba edat di 18 aña ku kier drecha kondishon.

Interesadonan por pasa tira un bista i hasi un prueba. Mester tin diploma A i B pa por inskribí i forma parti di e ekipo kampion aki. Pa mas informashon por yama 565-1490 òf 515-6175. Por manda e-mail na go.typhoon.swimclub@gmail.com i tambe por bishita e página di Facebook Typhoon Swimming Club i Instagram Typhoon Swimmers Curaçao.