WILLEMSTAD.- Despues di su éksitonan manera "Amor di Papa" i tambe "Puppy Love", Tyziano ta saka su kansion nobo "Bai Over".
Den e kantika aki Tyziano ta trese mensahenan positivo, pa traha duru pa yega na bo soñonan. Aworakí e hóben ta relashoná ‘bai over’ ku skol i ‘bai over’ di klas.
“Komo mayor i manager di Tyziano mi ta sumamente kontentu ku e reakshonnan ku nos ta hañando mirando ku no tin hopi kos di hasi pa mucha awendia i ta p’esei nos ke bin ku entertainment i tambe programanan edukativo pa mucha por ekspresá nan talento fo’i chikí”, asina Yasser Casseres a indiká.
‘Bai Over’ su género ta ‘Trap’ i a keda produsí pa “FamouzBoy”.
Un gradisimentu ta bai na Mini Me i tambe BBQ Express ku a kere den e proyekto i sostené Tyziano. Un danki spesial na Ryan QD Navarro ku a produsí e videoclip di ‘Bai Over’.