WILLEMSTAD.- Dia 21 di òktober Surival lo presentá pa loke por bira nan delaster konsierto “One for the Road” den WTC. Na 1980 Tony Fernan i Kevin Carty a fundá “Survival”. Nan a kuminsá komo un “entertainment band” pasa algun tempu komo “show band” ku vários show i konsierto den Sentro Pro Arte i tambe na airu liber.

Nan a aktua tantu lokal komo internashonal i despues a sigui nan karera tokando na fiestanan públiko i priva i tambe den shownan spesial. Nan tabata “house band” di Klup LA den añanan 90. E añanan aki ta masha eksitoso i a dura mas o ménos 15 aña largu. Na 1995 nan a stòp di toka i solamente riba algun petishon a bin bèk i a toka.

Aña pasá nan a hasi algu ku nan ta tin hopi tempu sin hasi, esta di produsí i toka un show. Nan a hasi esaki un tiki ku e pensamentu: Ban hasi esaki lihé, promé ku ta lat.  P’esei nan a titulá e evento aki: “ONE FOR THE ROAD”.

E evento aki mester bira un sorto di “nan bida musikal”, e bida musikal di Survival; e manera kon fanátikonan a karga ku Survival; kon músikonan, tékniko di zonido, bailarin i artistanan ku ta enbolbí ku Survival a eksperensia Survival. Di 1980 te awe, i e evento ta un homenahe na nan tur.

Survival ta tin mas ku 50 miembro den nan eksistensia, tantu músiko komo tékniko.  E produkshon aki ta un reto grandi pa Survival. Diferente ensayo mester tuma lugá, ya ku e banda no ta aktivo mas. Pero tur hende ta di focus i determiná pa logra. Semper Survival ta otro for di otronan paso nan fanatikada ta spera esaki di nan.

Tambe e fanatikada ta spera un fiesta, paso den esei Survival ta “master” i huntu ku nan amigu músikonan di Happy Peanuts i Highway Band, lo tin un tremendo “after party” despues di e konsierto.

Djasabra 21 di òktober WTC lo transformá den un zona di legria i 9’or en punto (bin na tempu) lo kuminsá ku e evento “One for the Road” i direktamente despues di e konsierto nos “after party” ta sigui.