WILLEMSTAD.- Ayera nochi AMAK a tene un rueda di prensa pa dje forma ei informá dje último desaroyonan ku tin relashoná ku Festival di Tumba 2020.
Presidente di AMAK, Feco Gomes, a informá ku a limpia rònt di Festival Center i ku ayera ku asombro a tuma nota ku tin hende ku a bin benta shushi kaminda a kaba di limpia algun dia pasá.
Pa loke ta trata e festival mes, Feco a informá ku djaluna awor lo sera porta for di 8 or di mainta pa dje forma ei Titan Security, empresa enkargá ku seguridat dje evento, por hasi kontròl kompletu i pa evitá ku ta trese kosnan prohibí den Festival Center.
Un dje partnernan, Venequip a pèrkurá pa tin sufisiente generator pa garantisá koriente. Lo tin sufisiente iluminashon tantu paden komo pafó di Festival Center. Brantwer di su banda a kontrolá i a hasi tur e kambionan ku tabata nesesario.
Pa loke ta trata e músikonan e organisashon a sòru pa e músikonan tin un área spesial parti nort pa parker. Lo drecha e área dilanti di Klave tambe pa duna e músiko mas fasilidat.
E balkon di hurado a keda drecha.
Ayera nochi e segun e rueda di prensa tabata tumando lugá, Feco a informá ku kompositor i areglistanan tabatin e oportunidat pa por duna splikashon na e kuerpo di hurado ku tabata presente.
Un total di 22 persona diferente a bisti e korona i ta pendiente awor pa wak si e aña aki un di nan lo ripití òf lo koroná un Rei òf Reina di Tumba nobo.
Pa loke ta trata e stage, Feco a indiká Historia di tumba lo keda presentá virtualmente riba stage. ‘Lo e bira un kos masha bunita’, Feco a splika.
E promé ku di dos dia lo tin animashon musikal promé ku e festival kuminsá. Pa loke ta trata e homenahe na Doble R, esaki lo tuma lugá djabièrnè. Lo dun’é 20 minüt di show i esaki lo sosodé sea mei mei dje anochi final òf djis promé ku anunsiá e finalistanan i ganadó di Festival di Tumba. E homenahe definitivamente lo no tuma lugá na kuminsamentu dje anochi final.