WILLEMSTAD.- Mañan anochi, 28 di desèmber lo tin e último show grátis di e aña aki riba Freewinds.  E show aki ta pinta di lo bira tremendo, sigur  si mira e dos kantantenan ku lo bai presentá.
E konsierto lo ta djaweps awor, mirando ku Freewinds ta yega Kòrsou djaweps mainta i ta regresá Aruba djabièrnè anochi. Pues kontrali na e dia normal di djamars, e biaha aki e konsierto ta djaweps dia 28 di desèmber.
E dos kantantenan Stacy Francis i Michelle Henderson no mester di introdukshon na Kòrsou. Siman  pasa Stacy Francis a presentá den un konsierto huntu ku e yu di tera Kadir Snijder. E show aki a laga masha masha hopi hende mes keda papia di e nivel musikal.
E konsierto di siman pasá tabata unu kaminda a interpretá algun kansion di Pasku, pero esun di e siman aki lo bira unu tremendo, kaminda e dos kantantenan aki lo bai demostrá nan habilidat di kanto.

Stacy Francis
Stacy ta un tremendo kantante i aktris ku a gira rònt mundu i a subi diferente esenario den produkshonnan musikal grandi i tambe a yega di aparesé den diferente programa di televishon manera p.e.: Third Watch (NBC), Half and Half. The Parkers (UPN), Yes Dear (CBS), Phil of the Future (Disney), Fastlane (FOX), Son of The Beach (FX)  i tambe In My Opinion (WB).
Tambe ela  yega di presentá en bibu den The Rosie O'Donnell Show, Showtime At The Apollo, Soul Train and The Macy's Thanksgiving Day Parade.

Michelle Henderson

Michelle ta un artista original di e Isla di Dominica. E tin 5 álbum graba i tambe un DVD bibu, miéntras ku den pasado el a  yega di gana kòntèst di kansion di Karibe.
Ta trata aki di un kantante ku tur ku a mir’é kanta aki na Kòrsou sa ku ta trata aki di un tremendo kantante lokal ku te hasta a yega di kanta na papiamentu

Entrada grátis

Manera a bira kustumber, entrada pa e konsiertonan ku Freewinds mes ta organisá ta grátis. E show ta kuminsá eksaktamente 8 pm i p’esei ta pidi tur hende pa nan tei for di 7:30 pa asina ei nan por subi i presensiá un tremendo show.
E barku Freewinds djamars awor dia 28 di desèmber  lo mará na Nieuwe Werf ku ta keda pasando na Panamá bai abou. Pa bo keda registrá pa un o mas asiento den e show aki, manda un app na  +59995130837  i bisa kuantu lugá bo tin mester. Tur esnan ku den pasado a yega di bai e shownan riba Freewinds sa kon bon e ambiente aki sa ta. E number +59995130837 ta únikamente pa manda app, ya ku e no ta risibí yamada.