WILLEMSTAD– DSCu (Damen Shiprepair Curaçao), CPA (Curaçao Port Authority) i KTK (Kompania di Tou Kòrsou) ta preparando atrobe pa risibí un di e barkunan di mas grandi na mundu den nos haf.
Wugang Atlantic, e barku di karga ku ta kategorisá di ta un transportadó di mineralnan masha grandi (VLOC: Very Large Ore Carrier a yega haf di Kòrsou ayera tardi for di Brazil despues di un biahe di aproksimadamente un siman.
Aki e ta wardando te ku mañan mainta, djasabra 19 di òktober den kareda di 5’or, pa pasa den Bahia Sta. Anna ku destinashon pa Damen Shiprepair Curaçao. Aki e ta mara na kade number 3 pa trabounan di mantenshon i di reparashon.
Pasamentu di e koloso aki den nos haf di Bahia di Sta. Anna, ku su tamaño di 330 meter largu i 57 meter hanchu, ta marka su historia di ta e di sinku barku di mas grandi ku a pasa den nos haf.
Esaki ta kòrda nos mashá e barku di karga un poko mas chikitu “Xin Guang Hua” ku a pasa na aprel di aña pasá den nos Bahia Sta. Anna ku e dos dòknan flotante di Damen Shiprepair Curaçao na bordo. E tin un largura di 255 meter.
