WILLEMSTAD- Ora ku aki na Kòrsou sierto merkado den e mundu di farándula ta suak den otro parti di Reino esaki ta kresiendo. Un di e islanan ku nos no mester balotá ta e isla di Boneiru kaminda aktividatnan di farándula ta brotando i ta birando grandi. Esaki ta pone ku artistanan bon di Kòrsou nan wowo ta habri i ta mira horizontenan mas ayá i ta tuma desishon pa bandoná nan isla i bai traha kaminda e heru ta kayente pa nan por strika.

Un di e artistanan ku nos a tuma nota ku a bai traha na Boneiru ta e gran artista, kantante profeshonal Danny Yanga. Danny aktualmente ta trahando na Boneiru  den ramo di show biz ku su mes kompania. Kosnan ta mustra di ta kana den bon direkshon i ku e trabounan ku e tin su dilanti ta basta. Aparte di esei e tin kontakto ku Kòrsou i lo sigui traha ku Kòrsou na momentu ku esaki ta ser eksigí di dje.

Ehèmpel di esaki ta su partisipashon pa otro aña den Festival di Tumba 2018. Danny Yanga ta un hóben profeshonal ku for di chikí tabata militá den gruponan di kanto pa mucha. Na vários okashon el a partisipá den Festival di Tumba di mucha. Na momentu ku el a drenta den su edatnan di hubentut el a forma parti di Doble R.SSS i Magic Sound. Tambe Danny tabata organisá su konsierto i teatronan.

Pa vários aña Danny tabatin un ròl prinsipal den e musikal The Lion King na Alemania. Despues di a hasi esaki pa hopi aña Danny a opta pa regresá su tera natal.  Trahando aki na Kòrsou otro portanan den Karibe a habri pa Danny i el a skohe aworakí pa Boneiru.

Banda di Danny Yanga tin un otro músiko den e kaso aki un eks trombonista ku tabata militá den GIO Fuertisimo ku tambe a tuma e desishon pa bandoná Kòrsou i bai establesé su mes na Boneiru. Ya e ta moviendo kaba den e ámbito farandulero i pa otro siman e lo ta establesé definitivamente.