WILLEMSTAD.- Ayera durante dia a drenta e notisia ku e gran baluarte musikal, Luti Samson a bai sosegá.
Ludwig ‘Luti’ Samson a forma parti di diferente agrupashon musikal na Kòrsou i a graba vários kansion ku diferente banda i artistanan manera Conjunto San Jose, Estrellas del Caribe, Estrea Antiana, Hóben den Caribe, Super Dynamic, Ronchi Matthew, Toro Colina, Arnell Salsbach, Miguelito Cuní, Doble R i e banda di Macay.
Na 1972 Luti a debutá den Festival di Tumba ku e komposishon ‘Hisa Benta’. Durante 30 aña Luti a partisipá na Festival di Tumba kaminda na vários okashon el a kai den finalistanan i na 1982 a keda koroná komo Rei di Tumba ku e komposishon ‘Kologá’ kompañá pa Doble R.
Luti den su trayektoria musikal a komponé mas di 50 kansion i a komponé i graba 2 kansion gospel.

‘Ta mi so den Boso’
Un dje éksitonan grandi Luti Samson ta sin duda e komposishon ‘Ta mi so den Boso’ ku a keda grabá pa Celia Cruz huntu ku Sonora Matancera i Fania All Stars. Maruja Boogaard i Izaline Calister tambe a graba e kansion aki sin konta diferente agrupashon musikal lokal ku a krea nan mes vershon di ‘Ta mi so den Boso’ manera La Ritmica.
Otro éksitonan grandi ku Luti a sea komponé òf kanta tabata: ‘Mesun Boka’; ‘Ora solo baha’; ‘No biba mi biba’, ‘Mas i Mas’; ‘Si Pancho kalma’; ‘Bagachin den Karnaval’; ‘Dal bai na bòshi’; ‘Drent’e pa bo gosa’ i ‘Tan Ten’, entre otro.
Ku Luti sosegá na pas, forsa na famianan.