WILLEMSTAD.- Feliciano Ricardo Alberto, mihó konosí komo Rishi, a nase dia 9 di yüni 1954 na Boneiru. E ta mucha di e bario di Indjannan di Noord di Saliña. Rishi ku su rumannan Frenk, Sep i Eyo, for di edatnan relativamente yòn a kuminsá hunga bala den nan ekipo di bario ku ta Estrellas. Rishi su karera deportivo ta partí den vários ramo di deporte, e.o. futbòl, tènis di mesa (pinpòn), vòlibòl, biar i sòftbòl. Den su karera komo futbolista el a yega di forma parti di selekshon di Antia Hulandes.

...Rishi Alberto di Estrelllas, Boneiru...

Karera komo deportista:
Rishi a kuminsá hunga futbòl ku 9 aña den e team di su bario Estrellas Junior. Ku 15 pa 16 aña, el a pasa pa e ekipo senior di Estrellas. Su posishon tabata delantero. Rishi tabata wòrdu konsiderá komo un di e mihó delanteronan ku Boneiru a konosé. Na vários okashon el a sòru pa hattrick i sali goalgetter di kampionato di Boneiru. El a bira kampion ku Estrellas i hunga Kopa Antiano. Den wega di Kopa Antiano na Aruba el a hinka un hattrick kontra Estrella di Aruba.
Na unda ku nan posishoná Rishi e tabata hunga bon. Na 1983 Rishi a para asta kiper pa Estrellas kontra Victory Boys den Stadion di SUBT.
Pa un periodo hopi largu di 35 aña Rishi a figurá den Estrellas di Noord di Saliña.

...Rishi den ekipo Estrellas di Noord di Saliña...

Ku selekshon Antia:
Den selekshon Antia e la hunga ku hopi hungadó di Kòrsou, e.o. Humphrey “Baartje” Koots i Jubi Martis.
Na 1972 e tabata den selekshon di Antia pa Weganan di Reino den Stadion di Rif, huntu Joy Sint Jago i Balbino Ben Anthony. Na e okashon ei nan a gana medaya di oro. Shete aña despues, den 1979, el a keda konvoká pa selekshon grandi di Antia Hulandes ku a bai Havana, Cuba.
Despues di a retirá for di futbòl kompetitivo, Rishi a bai hunga den e team veterano di su bario Noord Saliña Vets. Paisnan ku el a bai ku futbòl: Aruba, Kòrsou i Cuba.

Tènis di Mesa (pinpòn):
Rishi tabata gran hungadó di pinpòn. El a forma parti di ekipo nashonal di Boneiru pa kampionato CAC di pinpòn na San Cristóbal, Venezuela, huntu ku Leo Domacasse, Silvio, Juancho Lugo, Freddy Beukenboom.

...Delegashon di pinpòn di Boneiru pa Kampionato CAC na Venezuela...

Sòftbòl, biar i vòlibòl:
Rishi a hunga sòftbòl komersial den ekipo di su trabou. Su posishon tabata picher. Paisnan ku el a bai ku sòftbòl: Colombia i Sint Maarten. Mas aleu Rishi a hunga biar i vòlibòl.

Logro personal:
- Máksimo goliadó di kampionato ku 25 gol anotá.

Logronan ku ekipo:
- 1967/68 Sup kampion di Boneiru (Estrellas)
- 1969/70 Sup kampion di Boneiru (Estrellas)
- 1971/72 Sup kampion di Boneiru (Estrellas)
- 1974/75 Kampion di Boneiru (Estrellas)
- 1978 Kampion di Boneiru (Estrellas).

...Rishi a bira kampion ku su team di sòftbòl...

Logro ku selekshon di Antia:
- 1972 Medaya di oro ku selekshon di Antia na Weganan di Reino na Kòrsou.

Rekonosementu risibí:
- 2003: Kopa Internashonal dediká na e rumannan Alberto.
- 2003: Plaka di Mérito di J.C. Herrera.

...Delegashon di Boneiru ku a representá Antia Hulandes na Weganan di Reino 1972 na Kòrsou. For di man robes: Rishi Alberto (futbòl), Balbino Anthony (futbòl), Aubrey Seally (hefe di delegashon), Errol Joy Sint Jago (futbòl) i Rudy Domacasse (tènis)...