WILLEMSTAD.- Sra. Lisette Sambo Velder, direktor di Sektor di Kultura i Deporte di Kòrsou durante di su diskurso relashoná ku festival ‘Un Kanto pa Kòrsou’ a indiká ku e festival ta un medio pa edifiká nos nashon. Lisette a hasi un yamada na kompositornan, areglista i kantantenan hóben pa hasi uso dje posibilidat pa partisipá i pa kanta grandesa di Kòrsou. ‘Festival Un Kanto pa Kòrsou’ ta duna e oportunidat pa inspirá otro, momentu pa selebrá nos patriotismo, momentu pa demostrá e talento ku nos yu di Kòrsou tin, momentu pa nos skohe tambe e kansion mas mihó pa riba ‘Dia di Bandera’ nos selebrá nos nashon’, asina Lisette a indiká. Mas aleu Lisette a bisa ku ‘Kanto pa Kòrsou’ ta un medio pa edifiká nos nashon. ‘Akiden nos ta ban selebrá i nos ta ban kanta nos Pais, e beyesa di nos pais. Wak rònt di nos, nos tin asina tantu kos bon. Nos baluartenan manera Chin Behilia i Yeyo Calderon na kende e festival ta keda dediká a mustra nos e ehèmpel, awor nos tin ku honra nan pero tambe hasi uso dje oportunidat pa sigui nan ehèmpel. Na kabuya bieu ta konopá kabuya nobo. Ban hasi e di 10 edishon di ‘Un kanto pa Kòrsou’ un fenomenal, asina Lisette Sambo Velder a terminá bisando.