WILLEMSTAD.- E pelíkulanan kòrtiku ganadó di  48 Hour Film Project Curaçao, Aruba i Bonaire ta estrená e siman aki na e rònt internashonal di 48 Hour Film Project ku ta na Rotterdam, Hulanda e aña aki.
E rònt internashonal aki ta un festival di sine ku yama Filmapalooza, kaminda mas ku 100 pelíkula kòrtiku ganadó di rònt mundu, for di Tokyo te Capetown i Los Angeles te ku tur tres e islanan ABC ta kompetí pa ta selektá den e mihó pelíkulanan kòrtiku, ku ta gana entre otro un 'screening' na e sekshon di pelíkula kòrtiku di e prestigioso Cannes Film Festival.
Awe djasabra, 7 di mart e sineastanan i bishitantenan di e festival Filmapalooza lo haña sa kua ta e mihó pelíkulanan kòrtiku di 48 Hour Film Project na e evento final di e festival.
Angelo Lourens, ta e team leader di e team 'tnr actors', ku a gana e proyekto na Kòrsou den òktober di 2019 i awor ta representá Kòrsou na Rotterdam ku e pelíkula kòrtiku 'Un kas pa mi Mami'.