WILLEMSTAD.- Muchanan di Koro Angelitos,  e hóbennan di ‘VoiceMail’ ta preparando ku hopi entusiasmo pa nan konsierto 2018,  titulá "Un Mundu" durante kua nan lo presentá i batisá nan CD nobo nobo ku ta karga e mesun nòmber.
Kantantenan di Angelitos ta orguyoso di nan CD nobo ku kansionnan ku nan mes a skibi. Tambe nan lo kombiná e konsierto aki ku e magia di diferente kansion inolvidabel for di pelíkula di Disney.
Angelitos ta konsistí di muchanan sumamente talentoso. Nan ta repartí den grupo di mucha chikitu, di 3 te ku 7 aña, tambe esnan un tiki mas grandi di 8 te ku 11 aña i hóben di 12 te ku 18 aña.
Huntu nos ta forma "Un Mundu" ku union i hermandat, ku alegria i Amistat. Esaki ta e mensahe bunita ku Angelitos ta trese den nan konsierto inolvidabel ku  kanto, baile, fantasia, kuenta di ada, emoshon, humor i hopi mas. Dia 23 i 24 di yüni 2018 di 6.00 - 8.00pm na Teatro Luna Blou.
Apesar di kanta i toka instrumènt, Angelitos ta pèrkurá tambe pa un formashon sosial basá riba disiplina, norma i balornan. Esaki ta pèrkurá pa un desaroyo aún mas positivo di nan komportashon, aktitut i sentido di disiplina.
Karchi ta optenibel na Mensing's Caminada i serka tur miembro di Angelitos, VoiceMail i Framily Youth Orchestra.
Pa mas informashon òf pedido di karchi por manda un email na Ruthieangelitos@gmail.com  òf un WhatsApp na number +5999 511 8160.