WILLEMSTAD.- Tin diskushon atrobe relashoná ku ruta di Karnaval. Den e siman aki mes na un radio emisora e diskushon a konsentrá su mes riba e echo ku ora e marcha di Karnaval drenta Breedestraat Otrobanda esaki no tin e zjeitu i òf ambiente ku e mester tin, a komentá te hasta ku tin grupo ku no ta masha inkliná pa marcha den e parti final di e ruta di Karnaval.

Den pasado tabatin diferente alternativa ku a trese pa ku e ruta di Karnaval, a proponé pa usa Helmin Wiels Boulevard i te hasta a yega di trese dilanti ku tin personanan ku ta forma parti di e grupo di ‘stakeholders’ di Karnaval ku lo ke pa Karnaval kue direkshon di Wèg naar Westpunt.

Un kos ta sigur selebrashon di Karnaval di Kòrsou ta úniko, nos konsepto di selebrashon den kaya ku stellage i henter e ambiente ku stent di bende ko’i kome i bebe i ku e marcha ta pasa den pueblo ta nos punto mas fuerte.

Awor si tur aña tin diskushon riba e parti di final di Roodeweg i Breedestraat Otrobanda pa edifisionan ku tin chèns derumbá i henter e situashon ku Karnaval ta blòkia akseso na Hospital ta dikon nos no ta bòltu e ruta?

BAN BOLTU E RUTA

Un proposishon ku mester diskutí den tur esnan ku tin i ku segun ‘DEN E BEMBE’ ta esun ku fásilmente lo bo por kombens’é pueblo pa hasi ta bòltu e ruta. Laga e marcha sali for di Pater Eeuwensweg, subi van Eyck van Voorthuizenweg i bai terminá na Jan Noorduynweg.

E loke mester hasi ta usa e mesun banda di kaya ku ta usando aworakí, p’asina bo keda ku e hendenan ku ya a tin nan sitio di prekario i duna e grupo di ‘Hanchi Polar’ pa Colon e promé opshon pa e parti di Rooseveltweg i Jan Noorduynweg ku ta disponibel pa pone stellage.

Ku e bòltumentu di ruta hospital ta keda aksesibel, airport ta keda aksesibel di tur banda, hotèlnan na Piscadera ta keda aksesibel i bo sentro di siudat tambe ta aksesibel pa tantu turista i lokal. Bo transporte públiko ta keda ku uso di bushalte na Paris, Otrobanda sin ku mester kambia esaki.

‘DEN E BEMBE’ ta kere ku esaki ta e mihó proposishon kompará ku otronan ku tin riba mesa. Nos no mester laga nos konsepto di Karnaval den pueblo bai pèrdí, mantené esaki paso ta loke ta hasi nos diferente for di otronan.

‘DEN E BEMBE’ ta spera ku e artíkulo di awe ta bira un punto di diskushon pa nos tuma desishon fo’i tempran riba un ruta alternativo i ku esaki lo karga aprobashon di tur ‘stake holders’ i tambe komunidat. Nos meta ta pa duna un kontribushon na e fiesta di Karnaval.