WILLEMSTAD.– Ictual huntu ku e organisashon di Karnaval di Kòrsou, Fundashon JAG, ta presentá un inovashon nobo pa Karnaval 2020. Un solushon pa e pregunta mas kayente durante tur e marcha nan di Karnaval ku tur hende ta puntra: Und’e Kabes ta?
Ictual, un kompania di IT, ta presentá un app nobo pa kontesta e pregunta aki.
Na un manera visual i interaktivo ta duna bo e posishon eksakto di e kabes di Karnaval. Por download e app grátis via di Google Play store òf e App store di Apple.
Ictual connected solutions, un kompania di teknologia (IT) ku diferente solushon nan inovativo establesé na Kòrsou ya pa 27 aña, ta ke duna su aporte pa engrandesé nos Karnaval. Tabata un grupo di empleado a bini ku un idea pa konektá e pueblo ku e fiesta kultural mas grandi di Kòrsou esta Karnaval.
Tur aña di nobo na e stellage di Ictual na Marchena meskos ku mayoria hende e grupo di empleado aki tabata puntra su mes unda e kabes di e marcha ta? Anto asina pues a bini ku e idea di ban desaroyá un app kaminda unda ku bo ta sea na kas, kant’i kaminda òf komo turista na hotèl bo por sa unda e kabes di e marcha di Karnaval ta.
Usualmente Ictual ta un kompania ku tin servisio i aplikashon nan Business2Business. Anto un di e ‘values’ nan ta e parti social i fun anto ku e app: “Und’e kabes ta?” Ictual ke trese un solushon ‘fun’, simpel, práktiko riba merkado pa fasilitá henter pueblo di Kòrsou.
E app aki ta grátis i optenibel riba Google Play òf App Store pa tur tipo di smartphones. Tambe Ictual ta habri un plataforma pa duna oportunidat pa un grupo di impresario lokal limitá pa hasi merkadeo via di e app. Ta un bon momento pa reach nan públiko. Asina tambe nos ta yuda kubri e gastunan i por brinda e app pòrnada pa pueblo di Kòrsou. P’esei nos ke yama danki grandi na PEPSI ku a djòin nos komo e promé partner.
Ainda tin spòt limitá. Pa partnership por tuma kontakto ku Ictual pa mas informashon.
Por download e app for di aworakí pa sa Und’e kabes ta? pa e Marcha Hubenil, Tiner Parade, Gran Marcha anto e Marcha nan di despedida. Pa mas informashon check e wèpsait www.undekabesta.com