ORANJESTAD.- Kuerpo polisial di Aruba ta informá ku djadumingu nan a para un total di 22 bròmer (sportbike i skuter). Di e 22 bròmernan 8 ta sportbike di kua mayoria Hayabusa. E shofùrnan a haña verbal i a hiba e vehíkulonan warda pa falta di dokumentu, debí ku tabata kore sin reibeweis i tabatin un ku un plachi di number falsu. Tambe a hiba 4 skuter warda pa falta di dokumentu i e echo ku nan tabata kore sin un reibeweis kategoria A. En total e Unidad Motorisa a kita 12 sportbike i skuter djadumingu.

Tambe a kontrolá outonan riba kaminda públiko. A para 30 outo di kual 17 shofùr a haña verbal pa falta di dokumentu.

Den kontrol di alkohòl no a haña shofùr ku a supla mas di 220 ug/l pues no tabatin detenshon di shofùrnan ku a kore bou di influensia di alkohòl. En total a repartí 29 but di kua mayoria tabata na shofùrnan ku tabata kore sin reibeweis i dokumentunan bálido manera seguro pagá òf tambe tabatin vehíkulonan ku no tabata di kùr. Kuerpo polisial di Aruba ta indiká ku e kontrolnan aki ta sigui.