BRUSELAS, BELGIKA, AFP.- E komishon Oropeo a komprometé su mes na presentá un seri di medidanan sin presedente den próksimo dianan pa enfrentá e krísis energétiko, ku a trese e preisnan di mas haltu den historia pa loke ta koriente serka e konsumidónan di e bloke.
“Nos lo pone medidanan sin presedente den e próksimo siman pa un situashon tambe sin presedente”, asina e komisario oropeo di energia Kadri Simson a bisa na final di un reunion ekstraordinario di ministernan oropeo na Bruselas.
Den e enkuentro di urgensia aki, e ministernan di energia di e paisnan di Union Oropeo a diskutí e posibilidat di adoptá un preis di gas importá máksimo, mei mei di un konsenso riba e nesesidat di medidanan urgente.
Josef Sikela, titular di e industria di Repúblika Cheka (Pai ku ta ehersé e presidensia semestral di Union Oropeo) a bisa den un komunikado ku e ministernan a pidi e komishon Oropeo pa nan presentá un proposishon sólido i tangibel den algun dia riba kon ta bai atendé ku e maneho.
Den un konferensia di prensa, Sikela a sigurá ku tin un apoyo mayoritario di e idea di un preis máksimo pa gas pero el a pidi tempu pa definí kon ta bai implementá e inisiativa.
