WILLEMSTAD.- Ayera nochi a tuma lugá e estreno dje obra “No Por”, skibi pa Riangelo Esclodina i Shenyo Bokshoven, kual ta hóbennan di 18 i 24 aña. E inspirashon pa skibi e obra a drenta despues di a skucha un kansion di Shenyo kaminda e ta menshoná hopi kos ku ta pasando na Kòrsou ku por bai otro.

Den e obra aki kual tur aktor ta hóben nan ta para ketu na e echo ku tin hopi kos ku ta sosodé den nos bida diario ku mester bai otro. Den un forma kómiko pero realístiko e obra ta keda presentá i na final realmente públiko ta komprondé kuantu kos ta sosodé den nos bida diario ku mester bai otro.

E obra "No Por" lo wòrdu presentá un bes mas dia 16 di yüli na Teater Luna Blou pa 7’or di anochi. Karchi na rason di 20 florin ta optenibel serka Riangelo 515-0667, Shenyo 515-3387 òf na kantor di deurwaarder Bazur.

E obra aki ta un obra ku Kòrsou kompletu mester presensiá. Un mensahe profundo di parti nos hóbennan pa komunidat kompletu. Despues di e presentashon ku a tuma lugá ayera, Parlamentarionan ku tabata presente esta sr. Rennox Calmes i sra. Anna Maria Pauletta a mustra nan apresio pa e obra aki.

Ambos a indiká ku e grupo di hóben aki mester siguí ku e tipo di obranan aki.  Calmes a mustra riba kon e a kuminsá i perseveransia a pone ku awe e ta parlamentario i esei ta loke e ta mira den hopi di e hóbennan aki.

United Generation kier hasi apelashon na pueblo di Kòrsou pa pa kumpra bo karchi trempan pa djadumingu awor i bin relahá un ratu ku nos na Teater Luna Blou.