UPDATE - Polis a konfirmá Polis a konfirmá ku a detené e hòmber M.J.D.S. di 19 aña di edat nasé na Kòrsou na Kaya Berom.

WILLEMSTAD – Polis a konfirmá ku a hasi un detenshon di un sospechoso den kuadro di investigashon di asesinato di Rashid Darion Paulina, e bruder di Curaçao Medical Center (CMC) ku a haña morto na un sentro di plaser na Sorsaka. E detenshon a tuma lugá na Kaya Berom den área di Montaña Abou.

E konfirmashon di e detenshon importante aki a bini durante un entrevista ku bosero polis Imro Zwerver. E investigashon den e kaso aki a sigui durante último dianan i a kulminá awe mainta trempan. Te awor polis no a suministrá mas detaye tokante identidat di e persona detené ni su presunto envolvimentu den e krímen. No ta ekskluí ku lo por tin mas detenshon den e kaso aki. “E detenshon di awe ta hopi importante si”. Loke si por bisa ku e sospechoso ta un hende hòmber relativamente hóben.

Manera EXTRA a informá anteriormente, a haña e kurpa di Paulina den oranan di mardugá òf tempran mainta na un sentro di plaser na Sorsaka dia 21 di sèptèmber último. E víktima tabata den área di garashi, den un plas di sanger, ku un paña mará na su garganta. E tabatin un herida grave na garganta.

Paulina, nasé dia 28 di mei 1996 na Kòrsou, tabata traha komo bruder na CMC. Segun reakshonnan riba medio sosial, e tabata un persona dediká na su trabou i hopi kerí den komunidat.

Durante investigashon a lokalisá outo di e víktima na Kaya Yerba di Sangura na Montaña Abou. E vehíkulo tabatin daño na su parti dilanti i tabatin sanger den dje.

Polis a sigui ku interogashonnan i análisis di imágennan di kámara pa trata di rekonstruí loke a sosodé. E detenshon na Kaya Berom ta un desaroyo importante den e kaso. Ainda no tin mas informashon ofisial tokante e persona detené. Investigashon ta kontinuá.