WILLEMSTAD.- ‘Journey to Significance’ ta un organisashon ku ta traha riba entre otro desaroyo di e hóben su talento i tambe su desaroyo personal pa e siña liderá su mes dor di mehorá su imágen- propio ku un aktitut ekselente. Tambe e ta kreador di e programanan ‘Choreographic Leadership’ i ‘Crafting Young Entrepreneurs’.
Di 26 pa 29 di mart 2018 lo tuma lugá un plan di Formashon i Prevenshon ku ta karga e nòmber “Urban Dance, Leadership and Business Bootcamp Curaçao 2018”. E aktividat aki lo tin un  toke diferente pa e hóben ku ke hasi un diferensia.
E partisipante lo haña un kombinashon di diferente tayernan. E ta varia di tayernan di baile (Hip Hop/Lyrical RnB Style), tayernan di liderazgo, desaroyo personal i tambe e hóben lo siña kon pa lanta i merkadiá su propio negoshi.
E persona ku lo ta responsabel pa e tayernan ta Sr. Gerald Chirino (koreógrafo di baile internashonal, ‘business coach’ i orador internashonal).
E plan di formashon ta tuma lugá di 26 pa 29 di mart próksimo. E orario ta di 8’or di mainta te 1’or di mèrdia. E ta tuma lugá na Zona Kultural (ántes Teatro Luna Blou).
E invershon pa e plan di vakashon aki ta inkluí tur material i konsumo den e preis.
Pa registrá pa e plan di formashon  por tuma kontakto na number di telefòn 516-5265 òf e-mail j2sorg@gmail.com.
Mayor si durante di e temporada di  vakashon benidero  bo ta buska un aktividat ku por yuda bo yu alkansá su metanan yama i mesora reserva su lugá.