WILLEMSTAD.- Músikonan i e partisipantenan den e Gran Final di Festival di Tumba 2018 ku a tuma lugá djabièrnè último i a bai terminá den oranan lat di mardugá di djasabra a duna pueblo di Kòrsou un berdadero bankete musikal.
Nos bandanan a lusi ku kompañamentu musikal di un forma eksepshonal pa e kantantenan ku a presentá ku nan. For di Vega komo promé banda te ONE komo último banda e kompañamentu musikal tabata sublime.
Segun e anochi tabata transkurí tabata bira mas difísil pa por a pronostiká ken sigur lo a bira e Rei di Tumba. Kada kantante a bende nan mes hopi bon, loke a hasi ku ta tur kos tabata den man di hurado.

12 FINALISTA
Promé a anunsiá e 12 finalistanan den órden alfabétiko di banda: Urvin Jano, Rocco Franken, Reinier Lijfrock, Chendell Beaumont, Clarck Zalm, Roald Balentien, Boy Thode, Farley Lourens, Ray Lauffer, Guershon Naht, Djuric Virginie i Gilbert ‘Dibo’ Doran.
Despues a sigui e anunsio dje 10 finalistanan, aki Chendell Beaumont i Djuric Virginie a kai for dje lista.

PREMIASHON
Premio pa ‘Tumba Chistoso’ a bai pa Bryan ‘King B’ Goilo. Premio pa ‘Tumba Original’ a bai pa ‘E kaya di Stelashi’, interpretá pa Landry ‘Lele’ Gonzales.
Premio pa ‘Mihó Areglo’ a keda gana pa Ravello Antoin pa su areglo pa e tumba ‘Sende Lus pa Kòrsou’. Ravello a bai tambe ku e premio di promé finalista mihó areglo pa e areglo di ‘Ta pe koi mi ta biba’.
Di kuater finalista a resultá Rocco Franken ku a interpretá ‘Hey’, un komposishon di Hendrik de Windt ku areglo di Dwight Leoneta. Premio pa di tres finalista a bai pa Gilbert ‘Dibo’ Doran ku a interpretá su propio komposishon ‘Públiko E ko ta di bo’. Di dos finalista a resultá Farley Lourens ku a kanta ‘Ta p’e ko’i mi ta biba’. Raynor ‘Ray’ Lauffer a resultá e promé finalista kantando e komposishon di Amos Balentin titulá ‘Mi’n ta lag’e kai’. Rei di Tumba a resultá Urvin ‘Luwi’ Jano, kende a kanta ‘Sende lus pa Kòrsou’, un komposishon di Darwin Gregg.
Un pabien ta bai na tur músiko i kantantenan ku a partisipá na e gran final di Festival di Tumba 2018, boso a demostrá i presentá kalidat.