WILLEMSTAD.- Sr. Danny Macaya, country manager di UTS/ Flow a indiká ku e empresanan di telekomunikashon ta kontentu di por traha huntu ku Fundashon JAG pa promové i duna aporte na nos Kultura i nos Karnaval.
‘ E aporte aki no ta solamente den forma di nos produkto i servisionan, pero tambe ta den forma di un aporte finansiero p’asina Fundashon JAG por organisá un bon Karnaval 2020.
Di mes UTS/Flow ta sòru pa un bon kobertura di tantu nos servisio di mobil i di internèt riba henter e ruta di karnaval p’asina tur hende por kompartí nos bunita karnaval ku nan sernan kerí’.
Mas aleu sr. Macaya a indiká ku durante e karnaval e markanan Flow i Chippie lo ta visibel tur kaminda.
‘ Karnaval ta e fiesta kultural di mas grandi di Kòrsou i nos ta kontentu di por kontribuí na un plataforma kaminda nos hendenan por mustra nan kreatividat i nan talento. Nos ta sumamente orguyoso di por ta parti di karnaval komo e ‘telecom provider’ di fundashon JAG i nos ta orguyoso di tin e mihó karnaval di Mundo’, sr. Macaya a terminá bisando.