WILLEMSTAD.- “Curawood Singing Star Experience” ta un plan di vakashon espesialmente pa tur mucha for di 4 pa 18 aña ku gusta kanta. Nan lo gosa un bòl pero tambe nan lo siña masha hopi mes.

Den e plan di vakashon aki e muchanan ta bai eksperensiá tur loke un artista ta eksperensiá i ta bai sinti nan mes un artista.

Nan lo haña lès di kanto, tepnan pa komponé un kantika, Photoshoot profeshonal, trahamentu di Video Clip, Entrevista na Radio i Televishon, Studio di grabashon i tambe aktuashon riba tarima.

Na final di e siman aki nos lo klousurá ku un “Red Carpet show” ku e artistanan ku lo ta e muchanan mes. E show lo kuminsá kaminda e muchanan lo yega na gala bistí den un outo luhoso i lo baha riba un Red Carpet kaminda paparazzi i nan fanátikonan ta warda nan yegada.

Den e show nos lo batisá e disko kompakto ku e muchanan a graba na studio di grabashon den siman i tambe nos lo saka e “Curawood singing Star Experience Award” ku lo ta e mucha ku mas a resaltá den e plan di fakansi aki.

Na final di show kada mucha lo risibí nan sertifikado di partisipashon, potrèt di e photoshoot ku nan a hasi i lo haña chèns di firma cd pa tur nan fanátikonan presente i tambe lo lansa e video clip ku nan a traha.

Fecha di e plan di fakansi aki lo ta di 17 pa 21di yüli òf 31 yüli pa 4 di ougùstùs. E plan di vakashon aki ta organisá i dirigí pa Liesella Thomas. Pa mas informashon i pa inskripshon por tuma kontakto ku Liesella Thomas na 515-9434. Lugánan ta limitá i inskripshon lo sera mané e lugánan yena.