PHILADELPHIA.- Didi Gregorius ta meimei di su temporada di mas malu i a skohe un motibu kontroversial pa tira falta pa su ‘struggles’. Den entrevista ku el a duna, Gregorius a duna di konosé ku e tin problema ku un kokoti despues di a pasa vakuna pa COVID-19. El a desaroyá ‘pseudogout’, un tipo di artrítis ku ta dun’é hopi doló. Segun e shortstop ku e situashon aki a stroba su prestashon durante di temporada aktual.

“Tin hende ta bisa ta dje vakuna. “Ami lo bisa ku esei ta posibel”, segun e yu di Kòrsou. “Pero ora bo bisa esei, tur hende ta keda mira komo si fuera b’a papia ko’i kèns pasobra e vakuna supuestamente no ta duna tipo di reakshon asina”.

Ekspertonan ta séptimo riba e reklamo aki. Paul Offit, un spesialista di vakuna na Children’s Hospital na Philadelphia, ta bisa ku pseudogout no tin ningun relashon ku vakuna. E ta bisa ku ta posibel ku e vakuna ta pone ku e situashon por eskalá si ya bo tabatin e problema sin tabata na altura, pero ku esei lo keda pa solamente algun dia.

Segun Offit, no ta korekto ku luna largu lo bo tin e problema di pseudogout pa motibu dje bakuna. Ravina Kullar, un bosero di Infectious Disease Society of America, a duna di konosé di ta na altura di dos kaso di ‘rheumatoid arthritis’ despues di risibí e vakuna, pero einan tambe, no tabata pa tempu largu.

Gregorius ta batiendo pa un averahe hopi abou (.217) i porsentahe di yega base di apénas .275 i OPS .650, ku ta su sifranan mas abou for di despues di su temporada komo nobato. El a hunga 89 e temporada aki, pèrdiendo algun pa motibu di leshon na un kokoti.

Gregorius anteriormente a hasi operashon di Tommy John na e kokoti. Den aprel último el a leshoná e mesun man ora ku el a bai kue un fly den centerfield.