WILLEMSTAD.- Riba e kalènder di aktividatnan di Karnaval 2020 lo tin un variashon di eventonan pa e temporada. Apertura di Karnaval lo tuma lugá dia 3 di yanüari i lo ta un ‘jump up’ ku lo sali for di Waaigat i bai terminá na vèlt di SUBT na Kintjan. Su siguiente dia lo ta fecha pa Curaçao Carnival Village ku ta un anochi di konsierto ku lo tuma lugá den Festival Center ku presentashon internashonal di Burning Flames, Kevin Little i Krosfyah di Barbados. Bandanan lokal ku lo presentá ta Gio i Gentz. Dia 6 di febrüari lo tin un konferensia di Karnaval di Kòrsou su 50 edishon. 7 di febrüari ta fecha pa ‘Kings and Queen’s Night’ ku rekonosementu na Baluarte i Pilar di Karnaval 2020. Riba e fecha aki lo duna homenahe tambe na Reina, Prens i Panchonan di pasado. ‘Tumba Loko Loko’ ta tuma lugá dia 8 di febrüari riba vèlt di Mundu Nobo i por último pa promé biaha lo organisá un kompetensia di koreografia pa gruponan di Marcha di Tiner, e evento aki lo tuma lugá riba 20 di febrüari 2019.