WILLEMSTAD.- Curaçao Sail Foundation ayera nochi a tene un rueda di prensa kaminda e fundashon a duna informashon relashoná ku e gran evento ‘Velas LatinoAmérica Curaçao 2018’
Velas ta un regata grandi di Amérika Latina di kual Kòrsou ta forma parti di dje riba e dianan 15, 16, 17 i 18 di yüli próksimo.
Pa e evento dje aki, Velas LatinoAmérica Curaçao 2018 lo konta ku presensia di 10 ‘tall ships’: 1. Navio Veleiro Cisne Branco (Brasil); 2. BE Esmeralda (Chile); 3. BAE Guayas (Ecuador); 4. BAP Unión (Perú); 5. ARC Gloria (Colombia); 6. ARBV Simón Bolívar (Venezuela); 7. ARM Cuauhtémoc (México); 8. NRP Sagres (Portugal); 9. USCG Eagle (USA) i e fragata di Marina Real Hr. Ms. Friesland (Hulanda).
Yegada di e barkunan di bela grandi aki di Armada di e respektivo paisnan lo tuma lugá dia 15 di yüli mainta tempran. E yegada lo ta un espektákulo riba su mes ku ‘Buque Escuela Esmeralda’ di Chile ku un saludo di 21 tiru di kañon sigui pa un show na entrada di bahia di Sta. Ana na momentu ku e barkunan ta drenta.
Riba tur e dianan lo por bishita e barkunan entre 1’or di mèrdia pa 9’or di anochi. E barkunan lo ta mara na werf nan tantu parti di Punda komo Otrobanda. Tur dia for di 5’or di atardi te ku 9’or di anochi lo tin animashon musikal riba stagenan ku lo ta instalá na pia di brùg na Otrobanda, Matheywerf, Motetwerf i tambe na Kleine Werf. Riba e stage prinsipal ku lo ta situá riba Brionplein lo tin presentashon dia 15 di yuli di Junior Tecla ku Vibenation, dia 16 di yuli lo tin presentashon di Izaline Calister ku Marinierskapel di Ulanda i dia 17 di yüli Velas lo klousurá ku e presentashon di Oscar D’Leon i su orkesta. Pa otro siman lo duna informashon tambe di e show di antesala riba kada dia riba Brionplein i tambe e artistanan ku lo ta presentando riba e diferente tarimanan.

MARINA
Marina ulandes tambe ta forma parti di Velas LatinoAmérica Curaçao 2018. Pa e okashon aki Marina ulandes a prepará un show di demostrashon ku lo tuma lugá tur dia entre 9’or di mainta pa 5’or di atardi. Lo tin demostrashon ku boto, helikòpter, bahamentu di kabuya for di brùg Juliana i na Motetwerf lo tin un ‘Marine dorp’ kaminda lo duna demostrashon di e tarea i ekiponan di Marina ulandes.
Kòrsou ban risibí e barkunan di bela grandi dia 15 di yüli próksimo i durante di tres dia ban ser un gran anfitrion pa e mas ku 3 mil tripulantenan di e barkunan.
Curaçao Sail Foundation ta gradisí tur e spònsernan ku a kontribuí pa hasi e evento aki posibel. E promoshon ku Kòrsou lo haña ku e evento aki globalmente, no ta nada kompará ku e invershon ku a keda hasi pa realisá esaki.
Pa mas informashon bo por bishitá www.tallshipscuracao.org; página di facebook: velaslatinoamerica2018 i próksimamente lo lansa un App kaminda bo ta risibí tur informashon relashoná ku Velas LatinoAmérica Curaçao 2018.