BOGOTA, AP.- Un dalmentu di bùs ku tabata trasladando simpatisadónan di gobièrnu di Nicolás Maduro despues di e manifestashon di promé mei a laga 13 morto i desena di persona heridá.
E vehíkulo a dal kontra un otro bùs alrededor di lokalidat di El Tigre, 500 kilometer na sùitost di Caracas segun informashon di Fransisco Rangel, gobernador di estado di Bolívar, kaminda e dalmentu a tuma lugá.
E víktimanan a sali di siudat Guyana riba djadumingu anochi direkshon di Caracas i tabata bolbiendo kas djamars mardugá despues di a partisipá den e marcha.
Esnan heridá ainda ta interná den hospital di siudat Bolívar, segun Rangel su informashon na kadena Union Radio.
Venezuela ta bibando den protesta opositor fuerte durante último lunanan. Esaki a laga 29 morto te ainda.
