CARACAS, AP.- Outoridat venezolano tin e kadavernan di eks polis rebelde Oscar Perez i seis persona mas den kustodia. Nan a muri na komienso di siman durante un operashon kaminda e grupo a wòrdu sorprendé pa polis i guardianan nashonal.
E morto di Perez i su kompañeronan, despues ku organismonan di seguridat a haña sa unda su lugá di skonde ta, a generá denunsia di organisashon humanitario i opositor, kual a akusá outoridat di a ehekutá e grupo aki ekstrahudisialmente.
E kongresista Winston Flores, un di e miembronan di komishon parlamentario ku ta investigá e kaso i kende tabata alrededor di e mortuario, a konfirmá ku e kadaver di e víktimanan tabata wòrdu vigilá pa forsanan di seguridat.
Outoridat no a informá dikon a tarda ku entrega di e kadavernan na famia.
Miembronan di famia di Prezer, a eksigí pa haña e kadaver di nan yu ku a fayesé. Den un mensahe publiká riba retnan sosial, el a señalá ku e kier e kadaver i si esaki no sosodé, ta nifiká ku “pa ami e ta bibu”.
Durante un akto ku militar, presidente Nicolás Maduro a ekspresá su rekonosimentu di desena di militarnan i polis ku a partisipá den e operashon di desmantelamentu di e grupo rebelde i a akusá opositornan na Miami i Colombia di finansiá gruponan terorista di Venezuela.
