CARACAS, AP.- Polis polítiko di Venezuela a detené un kolaboradó di e lider opositor i hefe di Asamblea Nashonal, Juan Guaidó, kende a sigurá ku apesar di un ‘atake’ nobo di gobièrnu, e lo no bandoná su lucha pa Nicolás Maduro renunsiá komo presidente.
“Nan no ta bai hala nos for di riba kaminda”, asina Guaidó a afirmá. E ta konsiderá e detenshon di Roberto Marrero komo un ofensa na su persona i na e komunidat internashonal.
E dirigente a deskartá ku e aresto di Marrero ta un posibel paso promé ku su propio detenshon i a bisa ku “mihó e no tribi” pa deten’é debí na e “respaldo internashonal” ku e tin.
Guaidó kende a wòrdu rekonosé komo presidente interino di Venezuela pa 60 pais, a responsabilisá Maduro pa e echonan konsiderando esaki komo “inkonstitushonal” i a sigurá ku e akshonnan aki no ta spant’é.
E kasnan di Marrero i e diputado opositor Sergio Vergara, kende ta bisiña, a wòrdu registrá den oranan di djaweps mardugá pa diferente miembro di Servisio Bolivariano di Inteligensia Nashonal (SEBIN).
“Lamentablemente nan a haña un chèns ku mi. Sigui ku e lucha. No stòp. Kuida e presidente”, asina e opositor a bisa.
