LAS TEJERIAS, VENEZUELA, AFP.- Tres dia despues di e desplasamentu di tera kousá pa áwaseru fuerte, outoridatnan di Venezuela ta kalkulá ku tin “sentenáres di víktima fatal” den pueblo di Tejerias, ku 43 kurpa deskubrí i mas ku 50 pèrdí. Outoridatnan ta deskartá ku tin sobrebibiente.

Alrededor di 3.000 efektivo, inkluyendo polisnan, militarnan i miembronan di Protekshon Sivil ta koordinando esfuersonan di reskate huntu ku bisiñanan, pa kita e masa di lodo, palunan i piedranan den pueblo di estado di Aragua, despues di áwaseru fuerte.

Un bombero a bisa ku nan ta purba sigui e holó di deskomposishon pa rekuperá víktimanan, i ku “awe por hole esaki den vários kas”.

Presidente venezolano Nicolás Maduro a dekretá tres dia di luto nashonal, i a bishitá e zona di desaster djaluna i a primintí ku e lo rekonstruí kasnan i negoshinan den áreanan no vulnerabel.