WILLEMSTAD.- Un biaha mas Vesta den lat ta disidí wega na su fabor. Ayera nochi tabata Hubentut Fortuna ku a eksperensiá esei, despues ku nan a logra tene e skor na sero den promé tempu. Den di dos parti, sinembargo, Vesta ta ranka kibra i ta baha for di tereno ku viktoria di 3-0.

E partido den promé tempu tabata basta movibel, ku ámbos ekipo trahando riba avanse pero e tirunan riba gol tabata mínimo. Hubentut Fortuna, ku a start e partido ku apénas 7 gol den diesun partido, tabata pusha pa bai dilanti pero kada bes ta dal den e defensa di Sta. Maria.

Den di dos tempu un biaha mas direktor tékniko Caldera ta hasi su kambionan i dirèkt ta haña resultado. Kastaneer ku ta drenta wega ta abilitá e kueru pa Ruchendro Kierindongo ku ta habri e skor. Djis despues, Mirco Colina ta pone e skor na 2-0 i finalmente for di tiru liber ta skor su di dos tantu di e anochi: 3-0.

Un resultado ku praktikamente ta hinka Vesta den Buelta di 6, miéntras ku Hubentut Fortuna ta keda den sotano ku peliger pa degradá.

...Mirco Colina ta dominá e bala pa traha riba un atake. El a skor 2x ayera nochi...