Mirco Colina jr ‘Man off the Match’

WILLEMSTAD.- E ekipo di Vesta ayera nochi den stadion dr. Antoine Maduro a logra un triunfo di 2-1 den pitu riba Skèrpènè. Esaki den kontinuashon di e kampeonato di futbòl lokal liga MCB 2017 ku a keda reanudá despues di un ‘break’ ku tabatin pa e periodo di e marchanan di Karnaval.

Vesta, awor dirigí pa Henri Caldera, a logra bai kas ku 3 punto balioso i nan di dos viktoria di e aktual kampeonato.

Ku e triunfo di ayera nochi Vesta ta yega na 7 punto i ta pasa na kabes di e tabla di posishon ku 1 punto riba e ekipo di Jong Holland. Scherpenheuvel ta pèrdè nan di dos wega siguí i ta keda ku 1 punto na penúltimo lugá riba e tabla di posishon.

Pa loke ta e wega mes, Vesta a hunga muchu mas kordiná i motivá ku nan kontrinkante.

Vesta hungando inspirá pa un di su sparplùknan ku ta Mirco Colina jr. a move hopi i buta basta preshon riba e defensa di Scherpenheuvel ku mester a lucha pa tene nan arko limpi. Tabata Mirco Colina jr ku ta duna e ekipo di Vesta e bentaha di 1-0 na di 25 minüt di wega ora e bala krusa for di un tiru di skina i bin resultá serka su persona,  ku mesora ta toka e bala den gol.

Despues djei Vesta a sigui buta preshon riba Skèrpènè pero no ta logra anotá mas gol i e wega ta yega haftaim 1-0.

Den e di dos mitar e partido a bira un poko mas pareu i por a mira ku Vesta a sak un tiki den defensa dunando Scherpenheuvel chèns pa ataká. Riba un di e atakenan aki Skèrpènè ta logra empatá e wega 1-1 na di 79 minüt ku un tremendo gol di Benjamin Gil, un tiru te den e huki nobenta kologá ku e kiper di Vesta Gino Costina no por a hasi nada kuné.

Ora tur hende a pensa ku e wega lo a finalisá den un empate, Mirco Colina jr ta kue un bala riba ala robes i saka dos defensa ku un hugada briante i bin aden i lòs un fòsil riba e gol defendé pa Rowendy Sumter. E bala ta dal yega serka Jursley “Pipo” Kroonstadt ku ta manda e bala den nèt pa e gol di triunfo. E gol aki den tempu èkstra a kai manera un baño di awa friu riba e ekipo di Skèrpènè.  No masha despues Pablo de Avila rèfri di e partido a flùit pa final di e wega.