WILLEMSTAD.- Klup di futbòl Vesta lo ta anfitrion di Fundación Real Madrid pa un klínika ku lo tuma lugá di 5 pa 9 di ougùstùs próksimo aki na Kòrsou. Den konferensia di prensa ayera tardi, dirigentenan di Vesta huntu ku representante di Real Madrid a amplia riba e klínika ku ta pa mucha muhé i hòmber entre 6 pa 17 aña di edat.

Meta dje organisashon di Real Madrid ta pa motivá práktika di futbòl aki na Kòrsou i tambe duna mucha- i hóbennan oportunidat pa train ku nan ídolonan i asina yuda den nan desaroyo personal.

E klínika lo ta di djaluna 5 pa djabièrnè 9 di ougùstùs den oranan di mainta, di 08:30 pa 1:30. Spesial pa e klínika lo bin Kòrsou algun coach di Real Madrid i lo nan keda asistí pa téknikonan lokal. E plan di training ta hinká den otro segun metodologia i filosofia di Real Madrid, adaptá na e nivel i nesesidat dje partisipantenan.

Un kantidat di 30 coach lokal lo tin e oportunidat pa tuma parti na un kurso –teoria i práktika- duná pa e téknikonan di Real Madrid dia 4 di ougùstùs.

E klínika lo tuma lugá na Stadion Jo Mathilda, den Sta. Maria i lo kosta 300 dòler pa persona. Esaki ta inkluí: unifòrm Adidas di Real Madrid, bala, backpack, bòter di awa, pin i un sertifikado di partisipashon.

E dos mihó hungadónan lo haña un biahe pa Madrid, Spaña,  pa train den e siudat di Real Madrid, bishitá e museo i tambe Santiago Bernabeu kaminda nan lo presensiá un partido.

Registrashon a habri dia 24 di yanüari. Por hasi esaki via dje wèpsait www.frmclinicsdutchantilles.com