MERKA.- E kantante Victor Manuelle a keda rekonosé djaluna último pa Guiness World Record komo e artista ku e kantidat mas tantu di éksitonan registrá riba e lista di ‘Billboard Latin Airplay’.
Kantante, kompositor i produktor portorikeño, Victor Manuelle, a kuminsá su karera profeshonal na 1993 i te ku e fecha di awe a bende miónes di disko na nivel mundial. Ku e ta gusta pa públiko por ser nota den e echo ku e tin 71 ‘single’ ku a subi e lista semanal di éksitonan di Billboard.
Sertifiká ku ‘Multi Platinum’ pa RIAA (Recording Industry Association of America), 6 disko platina, 8 di oro, nominá na 18 okashon pa Latin Grammy i Grammy, premia pa 2 Latin Grammy, el a keda galardona ku 5 título di Guinness World Records pa: E mayor kantidat di éksitonan musikal registrá riba un lista di ‘Billboard Latin Airplay’; E mayor kantidat di éksitonan registrá riba Tòp 10 di Billboard Tropical Airplay; E mayor kantidat di éksitonan musikal registrá pa un artista maskulino riba Tòp 10 di Billboard Tropical Airplay; E mayor kantidat di ‘single’ ku ta alkansá # 1 riba e lista di Billboard Tropical Airplay Chart i e mayor kantidat di éksitonan musikal registrá riba e listanan di Billboard Tropical Airplay Chart.