CHARLOTTE, AP.- E video ku a keda publiká pa polis di e tiroteo den kual un hòmber kolo skur a muri i kual publikashon e manifestantenan a reklamá pa algun dia kaba, no a kita e duda si e hòmber a menasá polis ku un arma promé ku nan a tir’é. Polis a bisa ku Keith Lamont Scott tabatin un arma ounke bisiñanan di Charlotte a bisa ku e tabata desarmá. Riba e video no ta kla si e tabatin algu den su man promé ku un polis koló skur a tir’é mata. E video dramátiko aki ku a keda revelá djasabra pa polis lokal ta mustra vários polis, ku arma rondó di e hòmber promé ku a tir’é.
Riba e video di e kámara di un outo di patruya por mira Scott halando leu poko poko di su outo ku su mannan abou. Por a tende kuater tiru rápido i un hòmber a kai abou na suela heridá.
Despues di publikashon di e videonan, tumá for di e outo i un kámara di kurpa, e di sinku dia di protesta pa e tiroteo tabata grandi pero pasífiko.
Polis a blòkia kayanan di e sentro te den oranan lat, meskos ku a hasié e otro dianan, permitiendo e manifestantenan subi kaya pero sin konfrontashon ni ku nan outonan.
Polis a publiká potrèt djasabra di loke ta e arma kargá ku nan a haña na e lugá, afirmando alabes ku e tabatin DNA i ‘fingerprint’ di Scott ariba. Scott tambe tabatin mariwana serka dje, asina polis a bisa.
Famia i abogadonan a bisa ku nan duda tei ainda sin haña solushon ku e publikashon parsial di e imágennan.
” No tin pruebanan definitivo riba e video aki pero solamente un opheto den su man i si e tei kiko e opheto ta”, asina Justin Bamberg abogado di famia di Scott a bisa.
“Loke nos sa ta ku ora a tira Scott e no tabata move di forma agresivo riba e polisnan. El a hasi nèt kontrali esta bèk di forma pasífiko”.
Ray Dotch kuñá di Scott a bisa ku algun periodista a bai investigá pasado di e defuntu pero e ta kere esei no mester ta importante. Loke nan sa ta ku e tabata un merikano ku mester a haña mihó trato.
