WILLEMSTAD.- Rich ta keda un urban artist ku ta pusha e límitenan. E ta bolbe hasi esaki den e mas resiente track, ‘Kas den Mondi’. Presensia di Monifa Jansen ta asentuá e videoclip na mil i un manera. E diva yu di Kòrsou, ademas di tabata Miss Kòrsou na 2012 ta un di e modelonan lokal ku mas siguidó internashonal. Monifa Jansen e ‘ride or die chick’ di Rich Kalash den e videoclip ta gosando di un fan base impreshonante ku 602,000 siguidó riba Instagram.
Rich Kalash, ta mantené su posishon komo un di e rappernan mas kontraversial i ku un ángulo real di ‘kaya’.  El a demostrá esaki resientemente den e track  ‘Ku Mi Dios’ ku aktualmente ta na 329,000 ‘views’ riba YouTube den ménos ku 20 dia.
Palabranan kla i sin sensura; Rich Kalash ta kanta e sentimentu di e ‘hustler’, e lucha di kaya pa sobrebibí, traishon di amigu i amor di e peki. Kiko ta distinguí Rich Kalash for di sobra? Su nivel di kurashi kisas? Su persistensia den konta un historia real sin pretenshon? ‘Kas den Mondi’- te’sun di mas nobo pa Rich Kalash bou di e seyo di Decoded.
“Mi ke un kas den mondi, leu for di tur hende... “ parti di e letranan ku ta bira gráfiko unabes Monifa Jansen agregá su sensualidat.  E piesa produsí pa Pastor, a keda lansá e siman aki i ya kaba por wòrdu skuchá na radio i den 3 dia tin 67,000 ‘views’.
Por sigui Rich riba Instagram i Snapchat. Fanátikonan por mira e videoclip nan di Rich Kalash i tur artista di Decoded riba e YouTube Channel @decodedofficial òf solisitá e track na nan radio preferí. Ademas, por stream riba ITunes, Spotify, Google Play i Apple Music.