MEXICO, AFP.- Rekonstrukshon di e relashon ku Merka lo bira un tarea fuerte pa e presidente mehikano, Andres Manuel Lopez Obrador.
E posishon inkómodo a bira evidente djasabra pa motibu ku México a opta pa apstené di felisitá e presidente elekto Biden, argumentando ku e denunsianan di Trump mester keda resolvé. Trump no a rekonosé Biden su viktoria i a bisa ku e elekshon tabata froudulento.
“Nos no kier ta imprudente, nos kier ta kouteloso”, asina Lopez a hustifiká.
Trump a gana na aña 2016 ku un diskurso insinuando ku e mehikanonan ta “violadó” i ku “nan ta trese droga i krímen” den Merka. apesar di esaki, México a logra yega na algun entendimentu ku e mandatario republikano.
E analista di Konseho Mehikano di Asuntunan Internashonal, Miguel Angel Jimenez a bisa ku Lopez su reakshon ta konfirmá e pais su ‘relashon’ ku Trump i e preokupashon pa e simannan binidero ku lo kulminá su karera den Kas Blanku.
E polítikanan di migrashon lo keda kambia. Ounke Biden kanselá konstrukshon di e muraya di Trump na frontera, e restrikshonnan fuerte kontra migrashon lo keda vigente, segun indikashon di un eksperto riba e tereno di migrashon.