WILLEMSTAD.- Ku morto di Virgilio, “Wowo” Constancia mag bisa libremente ku “Hòmber a skarsa” na Kòrsou i naturalmente den su bario stimá Boka San Michiel. Tur ku a konosé Virgilio, “Wowo” Constancia ta bisa meskos, “Un hòmber di rèspèt, disiplina i masha bon hende”. Virglio Constancia no tabata solamente un futbolista di kaliber o bon tékniko, e tabata un gran edukadó i formadó di hubentut.

...Sin ‘train’ bo no ta hunga...

Serka “Wowo” Constancia, si bo no bin ‘train’, bo no ta hunga. Su subrino “Pipi” Constancia ta bisa bo:”Ni si bo ta Lionel Messi, si bo no ‘train’, bo no ta hunga serka “Wowo”.  “Wowo” tabata pone ku tur hungadó mester a pela, tambe ku nan mester ta limpi. Sapatu di bala no por tabata shushi. “Si bo wowo ta kòrá, tampoko bo no ta hunga serka “Wowo”, “Pipi” ta rekordá.

                                                     ...“Pipi” hungadó di aña, “Wowo” DT...

E “motor” tras di Jong Colombia e último añanan ta rekordá ku na aña 1993 el a keda skohé komo futbolista di aña, i ku “Wowo”, su Tio a gana e premio di DT di aña. Na aña 1968 Jong Colombia ku Virgilio den defensa a bira kampeon di region. Na aña 1994, atrobe kampeon di region ku Virgilio komo DT. Masha hopi futbolista a haña guia i formashon serka “Wowo” Constancia, i kla pa nan tabata ku serka dje disiplina ta loke mas ta konta. Sin disiplina i sin bin ‘train’, bo no ta hunga. Virgilio, “Wowo” Constancia a ‘train’ tur sekshon dje organisashon Saminero, kuminsando for di mucha te e onsena prinsipal. “Wowo” semper tabata bisa,”Bo ‘jeugd’ mester ta bon !!”...

                                                                      ...Masha hopi futbolista...

Hungadónan manera: Kid Jansen, Pipi Constancia, Eugene “chiki”, Eugene “Grandi”, “Yelo” Zimmerman, “Cafu” Martina, Armand Martina, Aldrin i “Dja” Thorbed, Lerry Antonia, Angelo Martina, “La Pacho” Benito, “Ish” Soleano, “Pempi” Bonifasio, Raymond Martina, Wilson de Jong (Kapitan), “Chelo” Obispo, Erico i Marlon Zimmerman, Eugene’i Libu Ignacio, “Robòt” Bonifasio, Wensley Martina ta djis algun dje hopi futbolistanan ku a hunga bou di Virgilio, “Wowo” Constancia. E tabata stima su bario, stima mucha i stima tur hende.

                                                                       ...Mau Maria ta konta...

Nos amigu Maurits, “Mau” Maria tambe tabata hopi yegá na “Wowo” Constancia. “Mau” hòmber di futbòl 24/7 ta splika ku “Wowo” tabata tremendo defensa den e tim saminero. E tabata hunga riba banda robes, i Tony Bonifasio riba banda drechi. “Un defensa duru, ku bo no por a pasa, aunke e no tabata hunga “shushi”, “Mau “Bèk Ariba” ta splika ku su dulsura deportivo. “Bèk Ariba” ta rekordá ku el a ‘train’ un selekshon di futbòl huntu ku “Wowo” Constancia, dos futbolista a bringa ku otro durante ‘training’, i “Wowo” Constancia ku tabata na kabes dje selekshon a pone bon kla ku si e dos hungadónan ei no pidi despensa dilanti di tur hende, nan no ta subi avion. Ora e dos futbolistanan a pidi despensa, nan a haña bendishon pa por biaha. “Mau” Maria ta rekordá tambe ku Jong Colombia tabata ‘train’ djadumingu mainta, despues di ‘training’ nan tabata landa, i ku “Wowo” tabata duna un “show” den laman. Mau ta añadí ku ora ku “Wowo” Constancia t’ei, no tin “wega”, e tabata imponé rèspèt.

                                                                     ...”Wowo” a bai kas bèk...

Tambe “Nan” ta konta ku na un okashon “Wowo” Constancia a pone bon kla pa direktiva di Jong Colombia ku un futbolista ku a faya ku disiplina no por biaha, ora el a yega aeropuerto i topa ku e futbolista kla pa “bai”, el a drenta su outo, i regresá su kas.

                                                                      ...Vários anékdota...

“Wowo” Constancia tabatin hopi anékdota tambe. El a yega di bisa:”Si bo papia tras di mi lomba, bo no a bisa nada!!”...Na un otro okashon, e “kampeon di disiplina” sin miedu a bisa na radio: “Ni kore e muchanan di awendia no ke kore mas”...

                                                                    ...Hòmber ehemplar...

Virgilio a traha hopi aña na Refineria Isla. Un hòmber ehemplar ku tabata stima su trabou, i stima su misa, su famia. I tabata kanta den kor.

                                                                          ...Piskamentu...

Den piskamentu tambe el a marka pouta, e no mester a bai leu pa pega Mulá, nòmber di su boto tabata Jair, nòmber di su yu hòmber i un èks delantero di Brazil.

                                                                             ...Kondekorashon...

Virgilio, “Wowo” Constancia tambe meresidamente a risibí kondekorashon Real. Sin duda nos a pèrdè un símbolo di disiplina, un hòmber ku tabata duna rèspèt, i imponé rèspèt ku ehèmpel.

                                                                                  ...Masha danki...

Amigu Virgilio, drumi dushi, bo mishon na mundu ta kumplí. A keda na nos ku ainda t’ei pa sigui ku e trabou ku bo a hasi, aunke hòmber pa imponé disiplina i rèspèt a bira skars, awor ku bo a “bai”. Amigu “Wowo” te despues. Masha danki pa tur loke bo a nifiká pa masha hopi hende !!

Skibí pa: Taffy de Jongh