WILLEMSTAD.- VivaKids Recycleband ta un proyekto piloto ku Omar Sling a kuminsá na aña 2017 kaminda el a disidí na invertí tempu i amor p’asina siña un grupo di mucha e balor di arte i músika i alabes e importansia di resiklahe i kuida nos planeta.
Ku lansamentu di e videoclip nobo aki VivaKids ke demostrá mundu kuantu bo por logra hasi ku tiki medio pero tambe ilustrá e poder den arte i músika pa restourá i trese hende huntu.
VivaKids
E muchanan di VivaKids recycleband ta bini huntu tur djasabra den atelier di Omar Sling. Akinan, di forma boluntario Omar i Team Viva ta invertí tempu i amor pa siña e muchanan pa medio di weganan, músika, arte, harmonia i tin bia asta di forma un poko kómiko kuantu kos nan por hasi por ehèmpel ku un simpel bleki bashí.
VivaKids ta konsistí na e momentunan aki di dos grupo; nos tin VivaKids Ruman Grandi kual ta e hóbennan di VivaKids ku bo por mira durante presentashonnan pero tambe tin VivaKids Ruman Chikí ku a nase e aña aki i ku guia i eksperensia di esnan den Ruman Grandi huntu ku Team Viva esnan di Ruman Chikí tambe lo mester krese i desaroyá nan talentonan a lo máksimo.
Mas ku tur kos VivaKids ke empoderá e muchanan aki pa ta adultonan kapas den futuro. Dunando nan tur e hèrmèntnan nesesario pa asina nan por hasi uso optimal di nan talento i usa esaki pa bon. Tur esaki ku énfasis riba e parti di resiklahe kaminda kada bes di nobo nan ta siña ku bo por logra kosnan bunita tin bia ku tiki medio.
Mi Ke Wak Bo Baila
Durante kada aña ta tèst e konosementu i abilidat di e integrantenan di VivaKids dor di traha i siña toka un kantika nobo, graba esaki den un studio di produkshon i traha un videoclip.
E kansion ‘Mi Ke Wak Bo Baila’ ta un cover di e artista merikano Meghan Trainor su kansion ‘Better when I’m dancing”. E videoclip ta ilustrá un famia humilde ku a vense opstákulo i bareranan pa medio di músika. Nos ta kere ku músika i arte ta trese hende huntu i ta kultivá alegria den bida di hende. Meskos tambe músika i arte ta un medisina masha efektivo pa nos alma.
Ku e kansion aki VivaKids kier enkurashá otro mucha i hóbennan pero tambe kualke adulto ku mester di esaki, pa lanta para meimei di kualke sirkunstansia ku siguransa den bo abilidatnan, tuma kurashi i mustra e mundu e kandela di positivismo ku ta brota den bo.
VivaKids no ke laga e oportunidat aki pasa bai sin ekstendé un gradisimentu di kurason na kada un di e Amigunan di Viva ku a kere den nos muchanan i tambe den e proyekto aki i a kontribuí di un forma òf otro pa asina yuda nos logra tur loke nos a produsí te ku awor.
Mas ku klaro e meta ta, pa sigui desaroyá, sigui krese i sigui invertí den e muchanan aki pa mañan nan ta bon ekipá. Pues si bo tambe ta kere ku bo por aportá na kresementu di e simia aki i bo ke bira un Amigu di Viva laga sa na 511-8202 òf 692-9533 i lo splika bo kon bo tambe por bira nos amigu.
Un i tur por disfrutá di e videoclip nobo di “Mi Ke Wak Bo Baila” tantu riba Youtube komo riba Facebook di VivaKids Recycleband. Like e videoclip i laga bo komentario atras. Tambe sigui kompartí esaki mas ku klaro i mustra asina bo aporte na e gran proyekto aki.