WILLEMSTAD.- Dia 21 di mart próksimo lo tin e obra skibi i dirigí pa Richailine Elisa “Wachten op mijn Papa”. E lo tuma lugá 8 or di anochi na La Tentashon.
E presentashon ta un ko-produkshon entre Teater KadaKen i e hóben artista yu di Kòrsou Richailine Elisa ku ta biba na Hulanda.
“Wachten op mijn Papa” ta un obra teatral skibí i dirigí pa Richailine Elisa, e ta bai tokante dos mucha muhé. Bieke (Priscilla Hijnen ) i Gaby (Shulayndra Poulina) kada un ta sinta na un parke ta warda riba un persona importante. Esaki ta nan tata biológiko.
Bieke tin 15 aña sin mira i tende di su tata. Porfin su tata ke mir’é i papia kuné.
Gabi nunka a konosé su tata, direpente el a risibí un karta ku su tata a manda pe. Den e karta e tata ta bis’é ku e tin hopi gana di wak e i si nan lo por topa mañan kuartu pasá di seis di atardi.
E dos mucha muhénan aki no konosé ni no a topa otro promé pero destino i e historia ku nan tin den komun a trese nan huntu.
Debí ku kada un tin ku warda riba e persona importante,  ta start un kombersashon entre e dos mucha muhénan aki.
E obra ‘Wachten op mijn Papa’ ta trese un problema kultural i sosial. Ku a obra aki e regisor kier trese temanan difísil pa por debatí i kibra ku e tabú. E obra lo keda presentá pa skolnan i mediante di e obra edukativo aki e hóbennan lo por  eksperensia  i enfrentá sierto situashonnan ora bo krese sin un figura paterno. Na final por tin un diskushon interaktivo ku e aktornan.
E obra ta skibí i dirigí pa Richailine Elisa nasé na Kòrsou.
Richailine Elisa i Teater KadaKen ta invitá henter pueblo di Kòrsou na e presentashon di “ Wachten op mijn Papa” dia 21 di mart 2020, 8 or di anochi na La Tentashon. Karchi ta na balor ni ANG 20,- optenibel na Mensing’s Caminada òf via Teater KadaKen na teatrokadaken@gmail.com òf via WhatsApp na +5999 672 4580.
Pa mas informashon tokante di e obra por tuma kontakto ku produktor di e obra Tesseley Jansen  na tesseley.jansen@gmail.com òf via WhatsApp na +31685412527.