ULANDA.- ‘Waioa’ ta un grupo rítmiko ku a keda fundá na yüni 2017 pa Cherston Seferina i Quincy Braafhart. ‘Waioa Music’ ta un grupo rítmiko kultural di hóben pa hóben pa duna realse na Kòrsou su herensia kultural.
Siglonan pasá nos antepasadonan indjan a bendishoná Kòrsou ku e nòmber ‘Waioa Itu’, kual ta nifiká baranka presioso. Kòrsou, un baranka sólido ku a i ketu bai ta produsiendo yunan di tera talentoso, ku amor i pashon pa nan kultura.
E grupo funda na Ulanda ta konsistí di aproksimadamente 17 hóben yu di Kòrsou. Hopi di e músikonan a forma parti di Grupo Karabela i Grupo Stripan, esaki a hasi e trabou mas fásil pa motibu ku nan tur tin e konosementu kaba pa loke ta trata e género di músika rítmiko lokal.
Waioa ta un plataforma musikal ku tin komo meta pa laga mundu sera konosí ku Kòrsou su kultura atraves di músika kultural adaptá i modernisá.
Waioa su mishon ta pa promové e kultura kurasoleño pa medio di músika kultural. Waioa ke pone énfasis riba e importansia di konosementu kultural, stimulando e generashon nobo pa balorá i apresiá nos historia i kultura.
‘Seú, Tin Pa Tur’, un seú komponé ku e enfoke pa ban uni mané ruman i pa stòp di bringa otro. Sigui Waioa via di nan página di Facebook: https://www.facebook.com/WaioaMusic/