WILLEMSTAD.- Pendiente pa su albùm nobo ku muy probablemente lo yama ‘Revival’, Eminem a introdusí un kansion nobo den kolaborashon ku Beyonce.
E duo, ku sin niun duda ta esnan mihó di industria a djòin pa produsí un balada emoshonal titulá ‘Walk on Water’.
No opstante ku e título ta duna un impreshon di nan status den e industria, e mensahe ta kue un buèlta diferente.
E kansion ta kuminsá ku Beyonce kantando koro indikando ku e ta ‘walk on water’, pero ku e no ta Dios.
Despues dje intro Eminem ta rap riba su karera i e preshon pa ta perfekto i konstantemente logra un meta nobo. E kansion ta kontinuá i e ta kuestioná kon ke kompar’é ku Dios, indikando ku e ta un fachada i ta eksigí hopi esfuerso ku un preshon enorme riba bo.
Den parti final dje kansion, Beyonce ta pidi mundu pa kòrda ku músikonan, te hasta esnan mas grandi, tambe ta un ser humano.
‘Mi ta kana riba awa únikamente ora ku esaki ta di fris, paso mi ta un humano meskos ku bo. Mi ta kometiendo fayo, si djis bo tabata sa, mi no ta kere ku bo mester kere mi, paso ami tin miedu pa laga bo na kaya’. Kontinuando e ta kanta: ‘Si mi kana riba awa, mi ta hoga’
E kansion aki ta pendiente pa aparesé riba e albùm nobo di Eminem.