ORANJESTAD.-Lo tene kontrol durante Boat Fest 2024 na Nikki Beach, asina Kuerpo Polisial Aruba ta informa. Boat Fest di Aruba ta paresido na Fuikdag aki na Kòrsou. E kontrolnan lo ta konhuntamente ku Wardakosta ku lo ta kontrolando djadumingu 21 yanüari 2024 durante di e aktividat di Boat Fest na Nikki Beach. Importante pa tene kuenta ku e pèrmit pa e evento ta di 11’or di mainta pa 6’or di atardi.

E informe ta bisa ku Wardakosta su patruyanan, huntu ku Maritiem Politie di Kuerpo Polisial Aruba lo ta riba laman pa konstantemente hasi kontrol. Huntu e kuerponan aki lo pèrkurá pa e seguridat di e evento.  E organisashon di Boat Fest tambe ta responsabel pa pèrkurá pa e seguridat di e públiko presente.

Polis di Aruba ta indiká mas aleu ku na kualke momento durante di e evento por kontrolá e dokumentunan nesesario ku e doño di boto mester tin kuné. Por ehèmpel: Vaarbewijs bálido, dokumentu di e boto ku ta stimulá loke ta rekerí pa tin riba boto, manera entre otro: chaleko salba bida pa kada persona, aparato pa paga kandela etc.

Ta hasi un petishon na públiko presente pa mantené nan mes na e reglanan relashoná ku e kantidat di persona ku ta permití riba e boto segun e dokumentashon ta stipulá. Ta pidi públiko pa disfrutá di e dia pero tene kuenta ku uzo di alcohol i tene konsiderashon ku hende riba laman mirando ku lo tin aglomerashon di hende y boto.

Polisnan na tera lo pasa kontrolá konstantemente pa asina mantene e seguridat riba tera. Korda ku 6’or di atardi e evento lo stòp i esaki ta nifiká ku lo mester paga tur musika. Hefe di distrito di Oranjestad a reuní ku esnan enkargá ku e evento pa asina repasá den e rekisitonan den e pèrmit.