ORANJESTAD.-Polis di Aruba ta informá ku djabièrnè anochi e deportamentu ku ta atendé ku radar a detektá un boto na mas o ménos 7 mia leu for di Aruba i mesora a bati alarma. Danki na bon kordinashon di wardakosta, sentral di polis, helikòpter, vigilansia di kosta i warda di San Nicolas a logra interseptá e boto.

Polis no ta menshoná e detaye ku wardakosta mester a tira dirigí riba e boto, spesífikamente a tira riba e motor pa asina logra para e boto. Prensa na Aruba ta informá ku lo tin persona indokumentá ku posiblemente lo a resultá heridá.

Di tur manera ta trata di 10 persona indokumentá ku a trata na drenta Aruba di forma ilegal, pero outoridatnan a aktua rápidamente kontra di esaki.

A hiba boto i e personanan na kazèrne pa mas investigashon. Outoridatnan di Aruba ta bisa ku nan ta na alerta pasobra teniendo kuenta ku situashon na Aruba i na otro banda e desaroyonan na Venezuela ta importante pa evitá mas hende indokumentá drenta Aruba.