ORANJESTAD.-Kuerpo polisial di Aruba den un deklarashon na EXTRA a konta kon den oranan di mardugá, na momentu ku e komunidat arubano ta sosegá, outoridatnan a sigui traha pa kuida kostanan di Aruba. Un bia mas tabata tremendo trabou di ‘radarkamer’ di polis, e unidat di helikòpter, polis marítimo i tambe bon koperashon i kordinashon ku wardakosta ku a logra interseptá un boto ku 31 persona ilegal, makaku i diferente paki na bordo.

For di tempran ‘radarkamer’ a detektá un boto na mas o ménos 7 mia leu for di Aruba. Mesora a bati alarma. E boto tabata direkshon pa Santana di Cacho. Danki na e bon koperashon a logra stroba ku hendenan aki ta drenta Aruba di forma ilegal.Bou di vigilansia estrikto a hiba e boto Aruba pendiente mas investigashon.