WILLEMSTAD -- "Nos no ta kontra Fuikdag. Apsolutamente ku nò. Pero kosnan mester bai mas kontrolá. Tin hopi ekseso i mester prevení e eksesonan aki", asina bosero di Wardakosta Roderick Gouverneur ta bisa relashoná ku e medidanan estrikto ku a tuma pa e aktividat di mañan.
Tur aña riba e promé djadumingu di aña ta tene Fuikdag pero komo ku e aña aki Aña Nobo a kai riba djadumingu, e aktividat aki ta tuma lugá mañan. Den último añanan e aktividat a krese enormemente pero bèrdat ta ku tabatin eksesonan tambe, manera bebementu di alkohòl i uso di droga. E situashonnan aki ta un peliger pa e hendenan ku ta bai atendé e dia aki pa nan plaser. Ademas mester chèk tambe e kalidat di e embarkashonnan ku ta bai e sitio i sin e pèrmitnan nesesario.
Gouverneur a bisa ku no kier daña prèt di niun hende. Tur hende ta liber pa gosa. A disidí ku e aña aki 5'or e músika den e área aki mester stòp. Despues lo guia e proseso mas tantu posibel pa e embarkashonnan sali bèk for di Fuik. Mester tene kuenta ku e entrada di Spaanse Water ta unu ekstremadamente peligroso i mester drenta einan ku e koutela nesesario. Den pasado tabatin diferente aksidente ku a tuma lugá ku ménos mal a kaba bon. Si hasi esei ora ku tin lus ainda, lo ta mas kumbiniente pa tur e botonan i esnan ku ta na bordo.
Gouverneur a bisa ku meskos ku karnaval ku tambe tin su kòntròlnan, aktividatnan riba awa tambe mester ta suheto na e tipo di kòntròlnan aki. “Nos kier pa kosnan bai nèchi. Pa hopi aña e aktividat tabata un "free of all". Nos kier pa tur hende gosa i pa e kos ta seif. Lo bai tin kòntròl tambe riba seadoo i jetskinan ku ta manehá den forma iresponsabel na e aktividat aki”, asina el a bisa.
Den e kaso di Fuikdag miembronan di wardakosta lo move tambe entre e hendenan tantu ku nan mes botonan komo ku jetski. Tur hende mester sigui órden pasobra e miembronan di Wardakosta tin tur outoridat pa aktua. Komo último rekurso por pasa pa detenshonnan na esnan ku no sigui órden. Un di e kosnan ku lo hasi ta ku lo kontrolá e kalidat di e emberkashonnan. Nan mester tin tur papel di nabegashon ku ta rekerí. Ademas ta wak kuantu hende tin na bordo i si tur atributo na bordo pa kualke eventualidat tei. Lo tin koperashon ku Polis, Brantwer, Ambulans i tambe Selikor ku lo hasi e trabounan limpiesa. "Nos a ripará ku hendenan por lo general ta sigui e órdennan ku nos duna. Nos a ripará ku e interes ta kresiendo ounke e aktividat ta mas kontrolá awor aki", asina e bosero a bisa.
Un punto di atenshon ta e ekiponan pa hasi BBQ ku ta pone serka di boto. Mester tene kuenta ku tin kombustibel den e botonan i esei por krea situashonnan peligroso. Ta bon pa tur hende ta konsiente di esei, asina Gouverneur a bisa.