WILLEMSTAD.- Un wega dramátiko i un final aun mas dramátiko. Esei ta lokual por bisa di wega number kuater dje playoff final di beisbòl Dobel-A, ku a resultá den un viktoria di 9-7 pa Wild Cats. Un triunfo agoniko despues ku Wild Cats a mira kon e skor di 5-0 na su fabor ta bòltu den di shete inning pa 7-5 na fabor di Sta. Rosa Indians, pero finalmente Wild Cats ta bin gana 9-7 i evitá ku e indjannan ta selebrá ku e titulo di kampion.

Kareda di empate di Wild Cats den di nuebe riba hit di Carlton Daal.

Wild Cats a konta ku un Jair Jurrjens ku a hasi bon trabou riba montíkulo i a pinta seis sero tras di otro, promé ku el a sali for di wega den di shete ku basenan yen. Tabata un di shete inning dramátiko ora ku Shakir Albert konektá homerun kontra dje relevista pa bòltu e skor 6-5 pa Sta. Rosa. Chris Pieters ta sigui su tras ku otro homerun pa pone e skor na 7-5.

Apesar dje ‘drawback’ okashoná pa algun eror mental den fildeo, Wild Cats ta logra bin bek den wega ku un kareda den di ocho i rally krusial di tres anotashon den nobeno inning. Hit di Carlton Daal kontra dje relevista Swendley Lint ta manda kareda di empate kas. Basenan ta yena i Randy Kirindongo ta risibí base por bola pa kareda number ocho keda anotá. Ta bin kambio di pitcher, pero Ardley Jansen ta saludá e siguiente relevista ku hit pa un kareda mas: 9-7.

Miéntras tantu, oloshi a kana yega den kareda di 11’or i tabata un pregunta grandi kiko lo a pasa si Sta. Rosa Indians empatá e wega. Finalmente esei a resultá di no ta e kaso i Wild Cats por a selebrá e viktoria, pero esaki pasando den un sustu despues di entregá un bentaha di sinku kareda.

Risandro Pastor ku a drenta den lat a gana e partido, miéntras ku Swendley Lint ta karga ku e derota.

Wega number 6 ta tuma lugá djasabra awor pa 6’or di atardi.

Risandro Pastor finalmente ta pinta un gran sero den bòm di nuebe pa e viktoria.

Chris Pieters (d) ta selebrá su homerun solitario ku a hasi e wega 7-5.

Bataso deskomunal di Shakir Albert a bòltu e skor na fabor di Sta. Rosa Indians. Momento ku ta risibí Albert na ‘home’.

Selebrashon serka hungadó indjan, pero finalmente nan ta bin pèrdè e wega.

Momento ku a relevá Jair Jurrjens despues ku durante di seis inning el a blankia e indjannan.