NEW YORK, USA (AFP).- E wes Juan Merchan, kende a presidí e kaso di Donald Trump akusá di a hasi pagonan skondí na un eks-aktris porno, a posponé e anunsio dje kondena pa 18 di sèptèmber pa motibu di desishon di Tribunal Supremo ku a dun’é amplio inmunidat, segun un dokumento hudisial.
E sentensia di Trump, ku mester a keda anunsiá dia 11 di yüli, a keda posponé pa 18 di sèptèmber “si ainda ta nesesario”, segun e wes den un karta dirigí na defensa dje magnate i na Ministerio Públiko.
Ku esei e wes a reakshoná riba un karta Ministerio Públiko di Manhattan ku un ratu promé a anunsiá su disposishon pa “aplasá” e anunsio di kastigu pa Trump despues di un moshon presentá na víspera di parti di abogadonan dje defensa di Trump.
“Ounke nos ta kere ku e argumentonan dje akusado no tin mérito, nos lo no oponé na e solisitut di pèrmit pa presentá nan puntonan (te 10 di yüli) i su petishon pa aplasá e sentensia”, segun e fiskal Joshua Steinglass den un karta dirigí na e wes.
E eventual kondena dje magnate lo tuma lugá despues di e konvenshon republikano, programá di 15 pa 18 di yüli na Milwaukee, na momento ku un Donald Trump kondená mester keda nominá di forma ofisial di parti di Partido Republikano komo kandidato pa presidensia den elekshonnan di 5 di novèmber.
E magnate republikano a keda deklará kulpabel na fin di mei pa un hurado popular di New York, akusá di 34 delito pa skonde e pago di US$130.000 na un eks-aktris di sine porno, den e rekta final di elekshonnan di 2016 pa e dama no a perhudiká su aspirashon pa yega White House den elekshon dje tempu ei kontra di Hillary Clinton.
E hues mas aleu a aseptá e petishon dje defensa di e magnate pa amplia e periodo te 10 di yüli pa presentá argumentonan nobo na fabor di su kliente. Despues di esei, fiskalnan tin te 24 di yüli pa presentá esnan di nan parti.
