WILLEMSTAD.- E wikènt aki Fundashon JAG huntu ku e tremendo trabou di Incredible Events ta organisá e elekshon pa embahadornan pa e tres diferente marchanan pa Karnaval 2019.
Awe, djabièrnè 1e febrüari, pa 7 or di anochi lo kuminsá e fin di siman di elekshon ku ‘Elekshon Rei i Reina Tiner 2019’ riba Kleine Werf. Ku partisipashon di 4 duo bon prepará i kla pa duna un bunita show. Entrada pa e evento aki ta 20 florin persona. Karchinan ta optenibel serka tur partisipante i na Sede di Fundashon JAG.
Mañan, djasabra 2 di febrüari lo tin ‘Elekshon Reina, Prens i Pancho Adulto’. E evento ta kuminsá 7 or di anochi i ta plania pa kaba 2 or di mardugá. Un kantidat di 8 Reina i 4 duo di Prens i Pancho lo kompetí pa e título máksimo.
Entrada ta 25 florin pa persona, karchi ta optenibel serka tur partisipante i na sede di Fundashon JAG.
Djadumingu ta konkluí e fin di siman di elekshon ku e ‘Elekshon di Reina, Prens i Pancho Hubenil’ den foodcourt na Sambil. E elekshon ta kuminsá pa 3 or di atardi i ta pone pa kaba 8 or di anochi. Shete kandidata pa Reina i 3 duo pa Prens i Pancho ta partisipando. Entrada pa e evento aki ta grátis.
Pueblo di Kòrsou ta keda invitá pa kumpra nan karchi i bin apoyá e partisipantenan. Fundashon JAG i Incredible Events ta invitá bo.