MERKA.- E mas resien komentarionan di Kanye West riba sklabitut, ta sigui generá rechaso di tur ángulo. Esun ku mas resien a uni su mes na e krítikanan ta su kolega i amigu, Will.i.am, kende a tilda West di ta ignorante.
E eks integrante di e banda ‘Black Eyed Peas’ durante di un entrevista na Inglatera a indiká ku West a kibra su kurason, esaki debí na e deklarashon kaminda West a insinuá ku e ‘afroamerikano’ pa eskoho a bira katibu.
‘Ma pensa riba mi mama ku a nase na 1920 i su konekshon ku su mama, kende a nase na final di 1800 i e mama di mi wela ku tabata un katibu.
Ora bo ta un katibu, bo tin un doño. Bo no tin opshon, un hende ta bo doño, bo no tin edukashon, esei no ta un opshon, ta algu ku ta wòrdu imponé, asina Will.i.am a indiká. E deklarashonnan di Kanye ta un di esnan mas ignorante ku un hende ku ta bini di un lugá vulnerabel por bisa riba su ansestronan, ku sklabitut ta un opshon? ‘Kiko bo ta pensando?’, asina e kantante a indiká di un forma iritá.